Cataluña

Antón Sánchez: «As Xeiras de Anova son un marco de debate e reflexión para actualizar a nosa aposta estratéxica pola Unidade Popular, hai reforzar a nosa alternativa ao PP como fixemos en 2015»

O portavoz nacional de Anova, Antón Sánchez, compareceu este mediodía antes os medios após da celebración da Coordenadora Nacional de Anova para subliñar o compromiso de Anova coas mareas municipalistas e explicar o iniciado proceso das Xeiras que rematará nunha Conferencia Política en febrero.

A Conferencia Política será o epílogo

Sánchez salientou que o obxectivo das “Xeiras é impulsar un debate sereno e reflexivo para actualizar a nosa aposta estratéxica pola Unidade Popular, tecendo alianzas fraternais coa esquerda comprometida cun proceso de ruptura fronte ao Réxime do 78”. Neste sentido, destacou que este proceso de deliberación de Anova “rematará nunha Conferencia Política que con toda probabilidade poderá ser en febrero”. Explicitou a aposta pola Unidade Popular que considera é preciso reforzar nos concellos, “é necesario reforzar a alternativa ao PP coo fixemos en 2015”.

Unha Conferencia, puntualizou, que remarcará o compromiso de Anova coas mareas municipalistas que “son o instrumento de cambio político e social nos nosos concellos. Correspóndelles a tarefa da transformación social. Son espazos abertos de participación política, plurais, van máis alá de militancias e contan cunha pluralidade política que incluso é maior que a de En Marea”. Para Sánchez as candidaturas de Unidade Popular “son un éxito e non hai que poñerlle paos na rodas”.

O compromiso claro de Anova coas mareas municipalistas

Deixou claro que “Anova non ten ningunha intención de emendar o programa de En Marea, ao contrario, queremos cumprir o seu programa. Precisamente o dereito a decidir é un elemento central do programa de En Marea. Por eso, o dereito a decidir e a apertura de procesos constituíntes”

A regresión nas liberdades, a recentralización e o dereito a decidir

Antón Sánchez apelou á pluralidade de En Marea para explicar que non haxa unanimidade e posicións distintas sobre a proclamación da República Catalá. En resposta ás preguntas dos xornalistas, no que atinxe “a Catalunya fomos moi claros. Hai tempo que deixou de ser un tema catalán, están en xogo as nosas liberdades e o dereito a decidir”, que está recollido no programa de En Marea.

Advertiu Sánchez “da regresión nos dereitos e liberdades que estamos a sofrer, así como o proceso de recentralización que se vai producir”. Por eso, optou por “enfrontar a situación con alianzas políticas reforzadas. Nos estamos coas forzas que desexen traballar en pro das mellores condicións políticas para que o pobo catalán poida exercer o seu dereito a decidir. Coas forzas democráticas e republicanas, e fronte á coalición autoritaria do 155”. Anova, sinalou, “sempre estará ao lado da xente que se mobilizou pacífica e democraticmente o 1 de outubro”. Así, indicou que “nos non plantexamos a cuestión do 21-D en chave eleitoral, o que está en cuestión é a derrota do bloco 155, o mal denominado constitucionalista que son os que máis a vulneran”

Nesa liña, manifestou “a nosa total oposición coa intervención da monarquía autoritaria o 3 de outubro”.

Antón Sánchez en RNE: «Feijóo incumpre reiteradamente o Plan Forestal que aprobou»

Audio da entrevista a Antón Sánchez en Radio Nacional

 

O señor Núñez Feijóo debería comezar por recoñecer as dificultades que ten para facer política para este país, e que provocan as condicións necesarias para que os lumes sexan un problema. Aquí xa se fixeron ditames de expertos plans forestais que sistematicamente foron incumpridos por parte do Goberno. O informe co Consello de Contas manifesta o reiterado incumprimento do Plan Forestal de Galicia. Menos tecer cortinas de fume con comisións e lexislación e máis poñerse a cumprir honestamente coas normativas. Dinnos que hai que cumprir a legalidade e logo andan na ilegalidade. Sempre dixemos que é un tema complexo, cunhas políticas de ordenación do territorio deficiente, que non deron resposta á realidade deste país. Hai unha aposta polo monocultivo de especies de baixo valor engadido e políticas que fomentan o envellecemento e abandono do noso rural.

O dispositivo para combater os lumes debera ser a última barreira da privatización: temos que traballar na ordenación do territorio, en modelos produtivos para fixar poboación e na diversificación de especies. O modelo de extinción ten que ser público, moito máis simplificado que agora, e profesionalizado.

A batería de propostas que presentou Núñez Feijóo son unha emenda á totalidade das súas propias políticas, xa que el mesmo as incumpriu. O problema son intereses empresariais moi concretos que marcan a súa política forestal. ENCE está ditaminando toda a política forestal do país. No seu Consello de Administración hai personaxes que tiveron responsabilidades de goberno co PP, como Isabel Tocino ou Carlos del Álamo. Por ENCE cambiouse a Lei de Costas, fíxose á súa medida. E por ENCE se está a facer esta política forestal. Non é un problema de racionalidade, son este conxunto de intereses os que están detrás

A Lei de Depredación, bautizada así pola sociedade civil, está escrita polos oligopolios eléctricos, mineiros e forestais. Afonda nun modelo empobrecedor, que xera pouco emprego e que deixa moitos impactos ambientais, que impide outras actividades. O PP traballa para eses intereses

Politicamente non ten sentido a privatización dos helicópteros. Otougorllese a Inaer un contrato millonario practicamente a dedo. Non é convínte misturar o negocio coa extinción de lumes

Sobre o espazo de En Marea

Anova apostou sempre pola Unidade Popular. É a única alternativa viable ás políticas da dereita. Dende sempre un consenso programático de En Marea é o dereito de autodeterminación, e o recoñecemento de Galiza como nación.

Estamos nunha encrucillada histórica, e debemos estar á altura. Temos que priorizar unha posición política digna nestes momentos. Non podemos defraudar ás persoas que nos apoiaron.

Como deputado de En Marea o meu deber é defender o programa que votaron máis de 270.000 persoas. Nel estaba o dereito de autodeterminación, o traballo para que Galiza teña soberanía, para poder decidir

Sobre Cataluña e a deriva autoritaria do Estado

Non é alleo a ningún demócrata o que está a acontecer en Cataluña, e non é só unha cuestión dos independentistas, hoxe estamos interpelados todos os demócratas.

O procés ten unha ampla base popular, é ten un comportamento cívico e pacifico. Nesa loita está moita máis xente que os cataláns, xa que estamos diante da defensa da democracia contra a represión e a posibilidade da volta atrás do sistema democrático.

Sobre o continuísmo no PSdeG-PSOE

Non notei cambio ningún dende que chegou Gonzalo Caballero á Secretaría Xeral do PSdeG. O 155 non facilita as relacións, aposta pola regresión e dificulta calquera entendemento co PSOE aínda que sabemos que a alternativa ao PP ten que ser plural.

Posicionamento de Anova sobre o encarceramento de parte do Govern catalán e o retroceso en dereitos e liberdades

Comparecencia de Antón Sánchez para fixar a posición de Anova respecto do encarceramento do Govern.

Audio da rolda de prensa.

 

Estamos ante unha solución autoritaria do golpe do 155, articulada en 7 pasos: 1) Represión policial: 2) Negativa ao diálogo e á negociación; 3) Control mediático; 4) Coacción económica; 5) Persecución de toda disidencia; 6) Instrumentalización política da xustiza; e 7) Amedrentamento dos cidadáns e as cidadás.

A petición do fiscal e a sentenza xudicial están escritas coa mesma tinta autoritaria que usan Rajoy e Soraya Sáez de Santamaría. É unha solución baseada no matonismo político, disfrazado de intervención xudicial.

Vemos como actúa xustiza española: é forte cos débiles, e débil cos fortes. Compracente e connivente cos corruptos, brutal cos disidentes e cos opositores políticos do Réxime do 78. Vemos a ausencia total dunha separación de poderes propia dun estado de dereito. Hai tempo que isto deixou de ser unicamente unha cuestión catalana.

Os que inventan casos de rebelión e sedición son os mesmos que nos falan de terrorismo incendiario, teñen a mesma materia prima: a mentira política ao servizo dos seus intereses partidarios.

É, pois, unha sentenza infame en calquera democracia. Estamos ante o infeliz retorno aos tempos do Tribunal de Orde Pública. A España dos 2 códigos penais: o código penal para os amigos, e código penal para os inimigos.

É indecente e moi grave que Urdangarín ou Bárcenas estean na rúa e os membros dun Goberno democraticamente elixido, en prisión. Pouco a pouco semella que imos indo cara á “solución Companys” que adiantou un guionista infame chamado Pablo Casado.

É unha resposta xudicial ás sondaxes que dan a vitoria ás forzas independentistas o 21-D. Actúan coma as forzas de asalto político de Mariano Rajoy, para abrir camiño a unha vitoria electoral do “bloque constitucional” o 21-D. Algúns pretenden gañar nas salas da Audiencia Nacional o que son incapaces de gañar nas urnas. Por iso mandan retirar urnas.

Resulta inaudito que en calquera sociedade democrática se poida falar de normalidade mentres que determinados actores políticos sofren prisión preventiva e ameazas de ilegalización.

Hoxe coñecemos tamén a proposta para ilegalizar as CUP, o que vai en contra de todo fundamento democrático. Só permitimos que a xente vote cando “vota ben”, esa parece a mensaxe que nos queren mandar. Insultan a intelixencia dos cidadáns.

A innovación de Rajoy: eleccións nun Estado de excepción, para gañar como sexa, coas trampas que fagan falta. Intentaron pechar colexios electorais e secuestrar urnas o 1-O. Agora pretender ilegalizar partidos e encarcelan dirixentes.

A solución de PP, PSOE e Ciudadanos: queimar as pontes de negociación e diálogo político no pasado, no presente e no futuro. Donald Tusk, unha persoa que está moi lonxe do que nós pensamos, dixo que “debía impoñerse a forza da razón”. Non hai razón, hai forza, guerra sucia e represión. Esa é a oferta autoritaria de Mariano Rajoy, aplaudida por Ciudadanos e apoiada polo PSOE.

Esta en marcha un sistema de criminalización da disidencia, mesmo cando vén avalada por fórmulas democráticas e pola maioría da sociedade catalá.

Non só interveñen o autogoberno, liquidan as garantías democráticas. Teñen a Constitución todo o santo día na boca, pero non din que o Título I da Constitución desde hai máis dun mes está suspendido. Están suspendidas dereitos e liberdades fundamentais en Cataluña.

Os que nos recortan dereitos civís e liberdades son os mesmos que nos recortan dereitos sociais. Os dereitos e as liberdades conculcadas hoxe en Cataluña están xa en perigo en Galicia. Son tempos de afouteza e coraxe civil para a defensa das liberdades e a solidariedade cos presos.

Chamamos pois á asistencia masiva ás concentracións de defensa das liberdades e solidariedade con Cataluña que terán lugar hoxe nas 7 cidades a partir das 20.00 horas. Temos que mobilizarnos, non vaia ser que cheguemos demasiado tarde. É urxente unha mobilización democrática para frear o tsunami autoritario do 155.

Unha mensaxe para o PSOE: xa sabemos de que lado estiveron até o dagora na aplicación do 155 e no recorte de dereitos e liberdades. Estivo do lado de Mariano Rajoy, de Ciudadanos. Queremos saber se despois destas detencións van seguir do mesmo lado. Ou se está co franquismo, coa volta ao fascismo, ou están do lado da democracia. Sería moi triste que os dirixentes socialistas de que non se poñan do lado da democracia. Chamamos aos socialistas que apoiaron a Pedro Sánchez para que non gobernase co Partido Popular para que apoien isto.

Esta loita gáñase sendo valentes, sen máis cancelas de que apoien todos os que defenden os demócratas.

Esta é unha loita que pasa as fronteiras de Cataluña. Cando encarcelan a dúas persoas da sociedade civil, ningún demócrata pode pasar indiferente. Ese sufrimento, a represión, é sentida como propia. Todas as persoas de esquerdas, antifascistas, temos que facerlle frente. Existe unha potenciación do fascismo, un recorte de dereitos e liberdades, e unha criminalización das ideas que se enfrenten co Réxime.

Anova denuncia a cerrazón autoritaria de Mariano Rajoy diante das permanentes ofertas de diálogo abertas desde Cataluña

Evidénciase, de novo, como o Estado español pecha as posibilidades dese diálogo. É o pobo catalán quen debe decidir sobre o futuro do seu país.

A aplicación do artigo 155 é un cheque en branco que lexitima unha saída “á turca” no Estado español. Comezaría un proceso de recentralización salvaxe que afectará a Galicia, coa posibilidade de maiores recurtes en dereitos e liberdades. A resposta de Rajoy é inadmisible nos termos dun debate democrático.

As ameazas e a represión evidencian a podredume total e terminal do Réxime do 78. Precisamos saídas democráticas.

Llibertat para Jordi Sànchez e Jordi Cuixart!

Anova chama ás forzas democráticas a mobilizarse para lograr a excarceración dos presidentes da Assemblea Nacional Catalana (ANC) e de Òmnium Cultural. A defensa da súa liberdade é a defensa das nosas liberdades. Conquistala debe ser obxectivo inmediato de todas as forzas democráticas do Estado comprometidas coa apertura dun proceso constituínte que poña fin ao réxime do 78 e á súa deriva autoritaria.

A orde de prisión contra Sànchez e Cuixart representa un salto cualitativo na vaga represiva e autoritaria coa que o Estado quere silenciar toda decisión soberana do pobo de Cataluña. As esixencias penais da Fiscalía, a despropositada decisión da xuíza Carmen Lamela e a creba de toda independencia do poder xudicial obedecen á estratexia do Goberno do Estado, que busca impedir o libre exercicio dos dereitos civís e democráticos dos cidadáns e cidadás de Cataluña.

O proceso por sedición contra os mandos dos Mossos e os activistas sociais réxese polas normas brutais do código penal do inimigo: impóñense penas preventivas por disidencia e posición crítica e politicamente perigosa e non por comisión de delito ningún.

A saída totalitaria á profunda crise de réxime que vive o Estado español posta en vigor polas forzas reaccionarias apóiase nos grandes poderes mediáticos e empresariais, na colaboración cómplice do PSOE e no aplauso da Casa Real. É en si un ataque terminal contra a democracia, os dereitos sociais e colectivos e as liberdades civís.

Jordi Sànchez e Jordi Cuixart son presos políticos. Están na cadea por mor do seu activismo social e as súas conviccións políticas. É unha das consecuencias da negativa do Goberno español a procurar, pola vía do diálogo, unha solución democrática ao conflito aberto con Cataluña des que o Tribunal Constitucional fanou o Estatuto de Autonomía aprobado pola cidadanía.

A detención de Sànchez e Cuixart deixa claro que a retórica que apela á defensa da legalidade só serve para agachar a violencia represiva e o autoritarismo do esgotado réxime do 78, incapaz de dar respostas democráticas ás demandas sociais e nacionais de liberdade.

Alén da esixencia de inmediata liberdade para estes dous presos políticos do Estado español, Anova chama a todas as forzas democráticas e de esquerda do conxunto do Estado á unidade popular e a configurar un Bloque Democrático e Republicano de ruptura que se enfronte sen dúbidas ao proxecto de saída totalitaria que o goberno de España e os seus apoios están intentando impoñer como peche dunha crise irreversible.

Anova apela a Rajoy a rematar coa vía represiva e autoritaria, aceptar o diálogo e respectar o dereito a decidir

Na súa avaliación do acontecido este serán no Parlament de Catalunya, Anova considera que «un proceso de autodeterminación fundaméntase no poder da xente do común, na decisión democrática soberana dun pobo que non se reduce a unha declaración formal dun Goberno ou dun Parlamento. Os cidadáns e cidadás de Cataluña fixeron efectivo o seu dereito a decidir o 1-O e sinalaron a Republica Catalá como seu horizonte político soberano».

A tolerancia e o respecto fronte á criminalización

Para Anova o 1-O demostrouse «a baixa calidade democrática do Réxime do 78». Nesa liña, advirte que durante os últimos días «e desde diversas instancias, algúns adicáronse a criminalizar aos que defendemos o dereito a decidir, e mesmo a aqueles que sen compartir esa posición apostaron polo diálogo como instrumento para resolver un conflito en lugar da represión policial do estado». Neste sentido, Anova reprochou mesmo a actitude «irresponsábel e ultra de Feijoó que saltándose o seu papel institucional se adicou a crispar en vez de adoptar un rol pacifista». Desde Anova obsérvase como se aproveitou o Procés catalán para recortar os dereitos civís de toda a cidadanía do Estado español.

Unha vez escoitada a iniciativa de diálogo proposta hoxe, «cremos que non ten ningunha razón de ser a posíbel tentación do Estado español para camiñar cara un Estado de excepción, proceder á aplicación do 155 ou insistir na represión e criminalización da decisión do pobo de Cataluña. A vía autoritaria é tan só a expresión do fracaso do Goberno de Rajoy para enfrontar a crise política do Réxime do 78».

«Está claro, puntualiza Anova, que o avance do proceso depende da vontade do pobo catalán. A República Catalá ven empurrada polo pobo mediante un exercicio de democracia radical. A nosa solidariedade está coa Cataluña que quer decidir en liberdade e pacíficamente».

Rolda de prensa sobre a situación política de Catalunya tras o 1-0

Antón Sánchez: «Hai que abrir un horizonte constituínte en todo o Estado que debe pasar polo respeto ao dereito a decidir e a democracia real».

Galdys Alonso: «A xornada do 1-O foi unha vitoria da democracia e unha derrota de Rajoy e do Réxime do 78».

Gladys Afonso, membro da Permanente de Anova, e Antón Sánchez, voceiro nacional, que formaron parte dunha delegación de Anova que seguiu en Barcelona a xornada do referendo do 1-O ofreceron unha avaliación do seu desenvolvemento nunha rolda de prensa.

«Temos dito moitas veces -enfatizou o voceiro de Anova- que o Réxime do 78 estaba morto, hoxe vemos a súa esquela nos principais xornais do mundo. A actuación do Goberno español entregado ao autoritarismo máis brutal quedou reflectida nas portadas dos principais xornais do mundo. A pesar da violencia e os atrancos, onte en Cataluña celebrouse un referendo e iniciouse a constitución da República Catalá. Non a parará con represión. O pobo catalán xa se está autodeterminando». «Fracasou a operación Annubis. Fracasou o recorte de dereitos e liberdades. Foi derrotado o inmobilismo. Fracasou a política dos que non queren mudar nada. Precisamos que no Estado se abra un proceso constituínte. Onte falou o pobo. O diálogo ten que basearse nesta realidade democrática e non en negala».

«Diante da súa incapacidade e incompetencia, Mariano Rajoy nega a realidade. Negouna cando o Prestige. Negouna durante o 11M. Non atendeu o 15M, cando milleiros de cidadáns saíron a rúa para denunciar os deficits democráticos e a corrupción dun Réxime que non nos representa. A política de desconexión é a de Mariano Rajoy, a desconexión coa realidade democrática», salientou Antón Sánchez que rematou a súa intervención sinalando que «hai que abrir un horizonte constituínte en todo o Estado que debe pasar polo respeto ao dereito a decidir e a democracia real».

Gladys Afonso, pola súa parte, apuntou que «As cargas lembran tempos do franquismo, levadas a cabo contra unha poboación que con alegría foi a pedir o voto. Significou O exercicio práctico do dereito a decidir, por un pobo que quere ser cidadanía e non súbido. E foi liberdade de expresión. O que fixo o Estado foi reprimir. Aprendinos que cando un pobo quere exercer os seus dereitos non se acovardan coa brutalidade». Sánchez insistiu que «onte o pobo catalán falou, e nós aplaudimos a súa decisión soberana. Achegamos a nosa solidariedade ao pobo catalán que onte deu unha lección de afouteza democrática. Foi unha vitoria da democracia e unha derrota de Rajoy e do Réxime do 78».

Anova asistirá como observadora a Cataluña durante a xornada do 1-O

Unha delegación de Anova, encabezada polo seu Portavoz Nacional Antón Sánchez, achegarase esta fin de semana a Barcelona para facer seguimento da xornada do 1 de outubro. Anova quere ser testemuña do respecto que as institucións do Estado lle deben á decisión soberana dos cidadáns e cidadás de Cataluña.

A presenza da delegación de Anova quere contribuír a suspensión do actual Estado de excepción que o executivo de Mariano Rajoy está impoñendo xunto coa aplicación de feito o artigo 155 da Constitución mediante a supresión de boa parte das competencias do autogoberno catalá e a utilización das forzas de seguridade para impedir a celebración do referendo.

Anova estará presente en Cataluña para manifestar o seu apoio ao dereito a decidir do pobo catalán, democraticamente vulnerado pola represión e a xudicialización do desacordo político.

A presenza solidaria de Anova quere ser unha denuncia da aplicación sectaria da leis e da violación de dereitos fundamentais. Suspéndese o dereito de reunión, impedindo a celebración de actos en locais públicos. Entorpécese a liberdade de expresión, forzando rexistros en imprentas e redaccións de medios de comunicación. Amedréntrase os cidadáns e cidadás cun despregue desproporcionado de forzas policiais para evitar a libre expresión da súa vontade política.

O executivo de Mariano Rajoy alenta unha estratexia autoritaria, fomenta o medo e impón policialmente o silencio da sociedade catalá. Os conflitos políticos resólvense con máis democracia, non con autoritarismo. Retirando urnas, coartando a liberdade de expresión e información ou impedindo a participación proscríbese toda solución política e imponse un estado de excepción que supón unha inaceptable suspensión os dereitos e liberdade democráticas.

Anova desexa que a xornada do 1 de outubro se poida desenvolver con absoluta normalidade democrática e que as institucións do Estado respecten a vontade política do pobo catalán. A delegación de Anova quere ser testemuña do respecto que se debe á decisión soberana dos cidadáns e cidadás de Cataluña

En solidariedade con Cataluña

Hoxe, 25 de setembro, ás 20:30 na Casa Común dos Tilos (Teo) desenvolveuse un acto de apoio e informativo ao proceso que está vivíndose en Catalunya pero que, polas implicacións que ten nos afecta a todas. Participaron nel representantes de distintas organizacións, institucións, amigxs e viciñxs de Teo. Entre algúns dos que tomaron a palabra estaban Xosé Manuel Beiras, Martiño Noriega, Luís Villares, Antón Sánchez, Luca Chao, Iván Rodríguez, Antón Dobao, Antonio Negreira ou Rafa Sisto. Deitamos algúns dos seus titulares.

Beiras: «Este Estado de excepción anticonstitucional non ten efecto en Catalunya, porque os cidadáns alí non teñen ningún medo. Debemos estar en pé de guerra cívica e solidaria, sen armas, plenamente democrática, contra un poder autócrata».

Martiño Noriega: «O PP xa chega a dicir que os acordos plenarios non representan á cidade de Santiago e que a situamos fóra da lei. Eles!!! Só por facer unha moción en apoio do dereito a decidir. Isto danos a medida do que está a acontecer: estamos ante unha apertura democrática ou ante un xiro aínda máis regresivo. O que está a pasar é verdadeiramente grave: empregan a CE78 como arma arreboladiza. En Zaragoza, os que alí estivemos, vímoslle a faciana ao fascismo. E o peor foi ao día seguinte: ver cómo os medios branquean o que está a acontecer. As imaxes que se ven son propias doutro tempo. Veñen tempos de exercer aquelo que dicimos e poucas veces practicamos: a solidariedade internacionalista».

Luca Chao: «O momento ten moita potencialidade, e conecta con ideas que deron lugar ao 15-M: cuestionamento da representación, feminismo…».

Iván Rodríguez: “a mocidade galega ten que solidarizarse con esta oportunidade para superar o réxime do 78, que xa non ten nada que ofrecernos”

Luis Villares : «É materialmente imposible parar a vontade de autodeterminarse dun pobo en chave de liberdade. Non hai policía nin forza que deteña as ansias de exercer a liberdade de tantísima xente»

Antón Sánchez: «Os cataláns saben que é unha loita pola democracia que vai moito máis alá de cuestións identitarias. As súas liberdades son as nosas liberdades. Xa gañaron: é imposible deter coa represión a millóns de persoas que están nas rúas».

Antón Dobao: «Desta fenda histórica que se abriu resulta un antagonismo claro entre totalitarismo e democracia, entre monarquía e república».

Antonio Negreira: «Logo de 40 anos de franquismo e outros 40 de fallida transición vemos como todo foi unha fraude. Contra todo isto vemos a rebeldía dun pobo, e aféctanos a todxs. Non sei se o Réxime caerá, pero nada será igual».

Rafa Sisto: «A lexitimidade democrática do estado español aséntase no non polo non. Teño 54 anos, e non votei esta Constitución. Igual daquela non quedaban outras saídas, pero 40 anos despois ten que haber máis saídas: detrás pode estar unha república agardando».