Anova responsabiliza á Coordinadora en funcións da situación actual de En Marea

Esiximos que se solventen as eivas que denunciamos para que se poida votar con limpeza e respectando a vontade das inscritas e inscritos expresada no Plenario do 27 de outubro

A Comisión Permanente de Anova reuniuse hoxe mesmo para abordar como único punto a situación extrema que vive En Marea desde que a súa actual Coordinadora en funcións decidirá unilateralmente paralizar as primarias internas que deberan elixir unha nova dirección política.

Anova cualifica de bochornoso e dun auténtico estado de excepción todo o proceso de primarias de En Marea, responsabilizando do mesmo á actual Coordinadora en funcións liderada por Luís Villares, nunha manobra para desmobilizar ás inscritas e inscritos de En Marea. Esixe que se reinicio do proceso de primarias esta fin de semana antes do fin de ano, e se realice mantendo a formula decida e aprobada democraticamente no Plenario de En Marea. Foron violentados diferentes elementos que deben ser corrixidos:

— Que o Comité Electoral saído do Plenario do 27 de outubro recupere as súas funcións, e remate a súa suplantación polos organismos en funcións de En Marea.
— Que os recursos materiais de En Marea se poñan ao servizo do Comité Electoral para garantir a limpeza do proceso.
— Que as inscritas de En Marea coñezamos o contido das auditorías, e non a interpretación de parte que fai a Coordinadora en funcións de En Marea.
— Verificación de transparencia e de limpeza do censo.

Anova considera que deben ser solventadas estas eivas para permitir a limpeza e a transparencia do proceso. Anova aposta por recuperar En Marea como fórmula de Unidade Popular, plural e de ruptura para a maioría da cidadanía galega lonxe dos ruídos internos e funcionamentos irregulares protagonizados por unha Coordinadora que paraliza unhas primarias internas sen ningún tipo de argumento demostrado e mesmo agochando o contido das auditorías.

Non é admisible que a actual Coordinadora en funcións pretenda como órgano executivo de En Marea dirixir un proceso electoral interno do que é unha das partes, e menos substituír ao órgano lexitimado para dirixir o proceso como é o Comité Electoral, tampouco pretender erixirse en xuíz e parte pretendendo destituír a algún dos membros do Comité Electoral pois é unha competencia que non lle corresponde e sería máis ben unha acción golpista. Recordamos que este órgano foi electo polas inscritas e inscritos de En Marea no Plenario e só o Plenario pode substituír ou destituír aos membros do Comité Electoral.

Anova convocou para mañá xoves a súa Coordinadora Nacional para decidir que posición adopta nun contexto no que a actual Coordinadora en funcións pon en perigo a continuidade do proxecto de En Marea orixinado co éxito das eleccións xerais de decembro de 2015 e reforzado na Asemblea de Vigo do 30 de xullo de 2016. A proposta da Coordinadora Nacional de Anova será facer un chamamento a participar e transformar a indignación das inscritas e inscritos nun revogatorio da actual Coordinadora de En Marea e recuperar o proxecto de ruptura e a democracia interna,

Anova considera que debe cesar a maneira irresponsable na que está instaurada a actual Coordinadora bloqueando un proceso ilegalmente que debería terse celebrado con normalidade o pasado 1, 2 e 3 de decembro, debe retomarse solventando as eivas que denunciamos sen máis demora, xa que as acusacións e escusas esgrimidas non se demostraron aínda por parte da Coordinadora en funcións, o que significa un claro exercicio antidemocrático e que ataca directamente o dereito a decidir das inscritas e inscritos de En Marea.

Xosé Manuel Beiras e Antón Sánchez entrevistáronse con Oriol Junqueras e Jordi Cuixart

Nas reunións trasladouse o apoio e a solidariedade activa de Anova Irmandade Nacionalista cos presos políticos e exiliados como consecuencia da organización do referendo do 1 de outubro.

Santiago de Compostela, 10 de decembro de 2018.- Hoxe Xosé Manuel Beiras e o Portavoz Nacional de Anova Antón Sánchez visitaron a prisión de Lledoners para trasladar a nosa solidariedade co conxunto dos presos políticos e exiliados catalás, e analizar o actual momento político, marcado pola xudicialización do proceso catalá e o auxe da ultradereita no Estado español.

Desta maneira puidemos coñecer de primeira man cal era a situación dos presos políticos nas cadeas, e como estaban a ser abordados os recursos legais para rematar canto antes con esta situación de excepcionalidade pola que levan meses en prisión preventiva. Lembremos que nestes momentos parte do colectivo de presos políticos comezaron unha folga de fame que hoxe chega ao seu décimo día como medida de denuncia desta situación.

Vivimos un momento complexo no Estado español, onde a coalición do 155 e a resposta autoritaria ao desafío democrático posto en marcha pola cidadanía catalá abriu as portas ao auxe da ultradereita. Ese avance supón unha mudanza relevante do escenario político, no que se fai necesario compartir análises sobre o momento e establecer marcos de colaboración política máis intensos.

Nese sentido os diferentes axentes cos que nos puidemos entrevistar expresáronnos a súa vontade de persistir no camiño democrático cara a autodeterminación de Cataluña, proxecto político que defenderon dende as institucións e dende a mobilización social, compromiso polo que seguen hoxe en prisión.

Anova denuncia a inxustiza imposta polo Tribunal Supremo en relación ao Imposto das Hipotecas

Antón Sánchez: «Temos que tomar novamente as rúas e as prazas de Galicia para derrotar á alianza dos poderosos. Esta sentenza demostra que o Tribunal Supremo toma partido: pon por diante o negocio da banca por riba dos intereses da cidadanía do común».

Santiago de Compostela, 7 de novembro de 2018.- Antón Sánchez afirmou hoxe que «temos que tomar novamente as rúas e as prazas de Galicia para derrotar á alianza dos poderosos» e valorou que «esta sentenza demostra que o Tribunal Supremo toma partido: pon por diante o negocio da banca por riba dos intereses da cidadanía do común». «Os dereitos que nos rouban hai que recuperalos mediante a mobilización e a rebelión cívica» salientou o Portavoz Nacional de Anova.

A decisión sobre o procedemento sobre o Imposto das Hipotecas supón unha vergonzosa concesión ao poder dos bancos que queremos denunciar publicamente. Estamos diante dun procedemento sen precedentes no funcionamento de calquera tribunal ordinario nun Estado democrático. Trátase de preservar unicamente un aforro para as entidades bancarias que se situaría entre os 3.200 e os 5.000 millóns de euros. Un aforro para a banca custeado polos cidadáns.

A decisión dos maxistrados do Tribunal Supremo evidencia a súa conexións cos principais poderes económicos do Estado español. Só as presións da Banca poden explicar a modificación de criterio que desautorizan as últimas tres sentenzas sobre este tributo na que se ditaminaba que eran os bancos os que tiñan que pagar este imposto.

Non sería a primeira vez que unha sentenza arbitraria da xustiza española é anulada polos tribunais europeos. Xa aconteceu coas cláusulas solo, na que finalmente os tribunais europeos primou o interese da cidadanía do común por diante dos intereses das entidades bancarias. Bancos moitos deles rescatados con cartos públicos que aínda non devolveron. Estamos diante doutro episodio de roubo legalizado para engordar os beneficios das corporación bancarias, unha mostra máis da falta de lexitimidade do poder xudicial do Réxime do 78.

A revisión da sentenza é anómalo en calquera democracia, a independencia do poder xudicial respecto dos grupos de presión é unha farsa que sacrifica a seguridade xurídica dos cidadáns e enxalza a a influencia dos poderes na sombra para deturpar o Estado de Dereito.

Antón Sánchez e Xosé Manuel Beiras visitarán a Oriol Junqueras e Raúl Romeva

Na visita á prisión de Lledoners achegaráselle a solidariedade de Anova Irmandade Nacionalista ao conxunto de presos políticos e exiliados cataláns inxustamente perseguidos por impulsar o referendo do 1 de outubro de 2017.

Santiago de Compostela, 30 de outubro de 2018.- O encontro terá lugar o vindeiro 10 de decembro na prisión de Lledoners onde os dous dirixentes políticos permanecen en prisión preventiva á espera de xuízo. Un procedemento cuestionado por diferentes entidades defensoras dos dereitos humanos, nun tempo no que vimos como tribunais de Estados da Unión Europea se negaron a executar euro-ordes e a aplicar medidas cautelares polos mesmos actos que xustifican no Estado español medidas de excepción como a prisión preventiva.

Este encontro pretende mostrar a nosa solidariedade esixindo que dirixentes políticos de formacións legais poidan realizar o traballo político nas rúas e nas prazas, e tamén nas institucións nas que foron electos, como é o caso do dirixente de ERC Oriol Junqueras. Entendemos que o feito de que sigan en prisión preventiva é unha mostra máis da deriva autoritaria que atravesa aos poderes do Estado español diante das demandas democráticas postas enriba da mesa por boa parte da sociedade catalá.

Dende Anova Irmandade Nacionalista defendemos que en democracia todos os proxectos políticos poden ser non só defendidos, se non levados á práctica se acadan as maiorías sociais suficientes para facelo. O Estado español debera recoñecer antes ou despois o que fixeron xa Canadá ou Reino Unido: o de entender que os conflitos políticos no século XXI teñen que dirimirse abrindo as urnas, e non poñendo freos á democracia. Imaxes como a das cargas policiais nos colexios electorais nese histórico 1-O forman parte da historia máis negra do Réxime do 78 e son impropias de calquera democracia.

Nese sentido vemos con preocupación determinadas afirmacións dos voceiros da dereita española que non descartan a opción de ilegalizar partidos políticos independentistas. Este tipo de afirmacións evidencian unha concepción cativa da democracia, que non acepta a existencia dun marco de respecto dos nosos dereitos sociais e nacionais e que mesmo pon en perigo dereitos e liberdades civís consagrados no propio ordenamento xurídico vixente.

Entendemos que a mudanza de goberno no Estado español debe abrir un tempo novo no que se atendan as demandas sociais das clases subalternas, ao tempo que se amplía e se mellora a democracia. Debemos empurrar nesa dirección para blindar as conquistas sociais e conseguir un marco de benestar para as maiorías sociais, no que se consiga un marco novo que respecte o dereito a decidir dos pobos.

Anova aposta por relanzar En Marea como ferramenta da Unidade Popular para a ruptura co Réxime do 78

A formación liderada por Antón Sánchez mantivo hoxe unha xuntanza da súa Coordinadora Nacional para definir a súa posición diante do Plenario de En Marea que terá lugar en Santiago o vindeiro 27 de outubro.

Teo, 20 de outubro de 2018.- Hoxe o principal organismo entre asembleas de Anova Irmandade Nacionalista expresou a súa preocupación polo momento que vive nestes momentos En Marea. Unha deriva burocrática, iniciada pola actual Coordinadora, dilúe a súa orientación política rupturista e lamina a pluralidade interna do espazo, convertendo na práctica a En Marea nunha opción de parte e non no punto de encontro da Unidade Popular en Galicia.

Vemos con especial preocupación que o debate do Plenario 27 de outubro teña o seu centro en cuestións internas, nun debate no que cuestións procedimentais e internas ocuparán a maior parte do tempo do debate en detrimento do necesario debate de ideas. Nese sentido o documento político que se presenta non defende ningunha orientación política e estratéxica clara, o que na práctica supón un cheque en branco para a dirección que salga electa neste proceso poida tomar calquera decisión nun momento decisivo no que hai que revalidar os gobernos municipais e ampliar a rede de mareas municipalistas.

Non compartimos os prazos dados para inscribirse no censo de En Marea. Se o comparamos cos prazos de procesos anteriores, recortan en case un mes o tempo para darse de alta no censo. Promoveremos, con outros axentes de En Marea, emendas que permitan ampliar estes prazos e que ninguén que o desexe quede sen poder participar. Tamén resulta sorprendente que o Consello de Mareas esixa que un organismo superior como o Plenario teña que ter unha maioría de 2/3 para introducir emendas ao Regulamento que establece o seu funcionamento.

Entendemos que tanto o Plenario como o proceso de renovación do Consello das Mareas debe supoñer un punto e aparte nesta forma de proceder. Debemos recuperar as posicións de ruptura e armar un espazo realmente respectuoso coa pluralidade como garantía máxima para blindar as mareas municipalistas e dar a batalla contra o Partido Popular.

Nese sentido facemos un chamamento ao conxunto do espazo de Unidade Popular – e moi especialmente ás mulleres e homes implicados no día a día da construción das mareas – para que podiamos conseguir estes obxectivos. Todas e todos somos necesarios para relanzar En Marea como ferramenta de ruptura co Réxime do 78.

Anova manterá unha xuntanza en Ourense con representantes das mareas municipalistas

Antón Sánchez participará nunha reunión con representantes de Ourense en Común, Ribeiro en Común e Alternativa Veciñal do Carballiño.

Santiago de Compostela, 24 de setembro de 2018.- O vindeiro martes 25 de setembro ás 20 horas no local de Ourense en Común (Rúa das Burgas, 8) terá lugar unha xuntanza para definir o traballo municipal de cara a asumir o horizonte 2019.

Unha delegación da Permanente de Anova encabezada polo seu Portavoz Nacional Antón Sánchez participará neste encontro con representantes de Ourense en Común, Ribeiro en Común e Alternativa Veciñal do Carballiño.

O obxectivo é mostrar o apoio de Anova aos procesos de Unidade Popular consolidados, nos que a nosa militancia participa a nivel individual. Entendemos que é fundamental traballar de forma colaborativa coas mareas municipalistas de cara a un ano marcado por unhas eleccións municipais decisivas para o noso espazo político, nas que debemos manter os elementos definitorios do noso espazo, marcados por unha aposta de democracia radical xunto con programas transformadores.

Documento de conclusións da Mesa para a Confluencia

0. Introdución: A hora da corresponsabilidade

A Mesa da confluencia debe ser unha mesa da corresponsabilidade, chegamos a ela porque partillamos un diagnóstico sobre a situación de degradación do espazo da unidade popular.

Agora sería o tempo de saber se existe a posibilidade de relanzar En Marea como ferramenta para asentar as bases dunha unidade popular máis forte, con renovada capacidade de aglutinar vontades, e con vocación de que todas as partes se corresponsabilicen.

0.1 A proposta de Compostela Aberta

Partindo da lóxica da cooperación entre as partes e desbotando as dinámicas competitivas de confrontación interna Compostela Aberta fai dúas propostas:

Constituír un espazo de traballo conxunto para as organizacións e mareas.
Renovar e relanzar o Consello das Mareas como órgano de dirección política.

Ese espazo de traballo conxunto é a chamada ‘Mesa da confluencia’ constituída como espazo de comunicación entre as organizacións políticas e mareas para resolver diferencias procurando a corresponsabilidade das partes na construción do espazo político en común.

Renovar o Consello das Mareas para continuar co desenvolvemento de En Marea, garantindo a igualdade de todas as persoas participantes a través da súa adscrición individual.

Obxectivo: desenvolver un espazo organizativo de coordinación, que constrúa un programa político común e marque a estratexia para o conxunto do espazo de unidade popular galego.

0.2 Resumo das reunións bilaterais

Seguindo o mandato asembleario recollido no documento “Proposta de Compostela Aberta para relanzar o espazo político galego da unidade popular”, a coordinadora de Compostela Aberta realizou unha rolda de conversas bilaterais con Esquerda Unida, Podemos, Anova, Ferrol en Común e En Marea.

En liñas xerais o diagnóstico de Compostela Aberta é partillado no relacionado coa degradación do espazo, aínda que se mantén a validez de En Marea como ferramenta e espazo de articulación do suxeito galego da unidade popular.
Tamén é un lugar común maioritario que o actual deseño de En Marea non é valido tal e como existe agora, mais que si podería valer no caso de que se plantexen axustes ou mudanzas.
A coordinadora de En Marea abriu a posibilidade de adianto da renovación do Consello das Mareas, aínda que non participará da Mesa na procura da corresponsabilidade.

1. Puntos en común

Partindo da lóxica da cooperación entre as partes e desbotando as dinámicas competitivas de confrontación constituíse a ‘Mesa para a Confluencia’ como un espazo de comunicación no que participan as organizacións políticas e candidaturas locais da unidade popular.

Este espazo de traballo conxunto constitúese para resolver diferencias e para procurar a corresponsabilidade das partes na construción dun espazo político galego en común.

Orixinariamente na ‘Mesa’ participan Anova, Esquerda Unida, Podemos, Compostela Aberta, Ferrol en Común e Marea Atlántica. Esta composición fica aberta a novas incorporacións dos axentes que soliciten e após a aprobación por consenso dos participantes actuais.

Na reunión constituínte do 31 de xullo abordáronse os puntos en común dos que partimos para relanzar En Marea como ferramenta para asentar as bases dunha unidade popular máis forte e con renovada capacidade de aglutinar vontades.

1.1 A necesidade da unidade popular

Partindo das experiencias políticas acumuladas e tendo como modelo para a confluencia as candidaturas municipais que mostraron o camiño no 2015 a unidade popular tense mostrado como unha ferramenta, ao servizo da cidadanía, moi efectiva.

Neste sentido, para relanzar o proxecto e potencialo, consideramos necesario resaltar as seguintes cuestións:

A necesidade da defensa do municipalismo e das candidaturas da unidade popular xa asentadas e nas que se recoñece o espazo.
Estas candidaturas municipais son un exemplo de como se pode conformar a confluencia, e nos seus modelos debería recoñecerse En Marea.
A unidade popular ten que recoñecer os elementos e organizacións que a conforman e, partindo diso, reforzar o conxunto e as partes.
O recoñecemento das diferentes identidades políticas debe vir acompañado da recuperación da pluralidade da confluencia
Unidade non significa uniformidade, non son sinónimos; a pluralidade interna enriquece e torna máis forte un proxecto político que ten vocación de ser hexemónico.
Para todo o anterior, é necesario que as partes se corresponsabilicen na construción do espazo e na defensa destes principios.

1.2 O suxeito político galego

O recoñecemento dun suxeito político galego significa entender que a unidade popular operará en consecuencia con este principio no plano organizativo e político. A construción deste suxeito nacional galego significa un encadramento natural que, dende a súa propia soberanía pode procurar complicidades noutros ámbitos de actuación como é o estatal, por exemplo. Neste sentido, para relanzar o proxecto e potencialo, consideramos necesario resaltar as seguintes cuestións:

É imprescindible reforzar o suxeito político galego a partir da definición duns obxectivos comúns que sumen e multipliquen.
Estes obxectivos teñen que traducirse nun programa político transformador, que sexa alternativa ás políticas neoliberais.
Compre diferenciar entre o formato legal do suxeito e a articulación orgánica do espazo da unidade popular, que non sempre teñen que coincidir.
A articulación orgánica do espazo non pode traducirse na construción dun partido vertical de corte clásico; compre formulas innovadoras e horizontais.

2. A validez de En Marea

A pluralidade, a diversidade e a capacidade de mestizaxe son os sinais de identidade da unidade popular e non se pode renunciar a elas. En Marea terá validez sempre que se respecten estes principios. Nos municipios onde fomos capaces de construír ferramentas que aceptaron este feito con naturalidade, constituíndo forzas abertas pero compactas, estase a demostrar que outra forma de gobernar a prol da cidadanía é posible.

Este principio de respecto á diversidade e representación da pluralidade ten que ser aceptado con normalidade na consolidación do suxeito político galego que debe ser En Marea. Na segunda reunión da mesa para a confluencia, do 9 de agosto, abordase o ‘para que?’ nos debe valer En Marea e o ‘como?’ renovar o Consello das Mareas para relanzar o proxecto común

2.1 Unha ferramenta para a unidade popular

En Marea vai ter validez se funciona como ferramenta para a unidade popular e consegue representar ao conxunto e as partes. Neste sentido, a unidade popular necesita falar e reflexionar sobre a confluencia, sobre si mesma, necesita voltar a vista atrás, recoñecerse nos acertos e revisar os erros:

É importante lembrar o éxito acadado nas experiencias municipais e a posterior onda de entusiasmo colectivo que arrastrou a En Marea a obter os históricos resultados acadados nas xerais de 2015 e 2016.
Do mesmo xeito non podemos obviar como as divisións, pelexas e discrepancias públicas están a minar o proxecto, coa consecuente baixa nas expectativas electorais que se auguran nas enquisas.

Necesitamos fuxir da tradicional división das forzas da esquerda galega. A construción da unidade popular é unha tarefa común na que temos a obriga de participar todas as que queremos unha mudanza real en Galicia, unha mudanza que xa é visible nos municipios nos que se goberna.

Forzas políticas, colectivos sociais ou persoas individuais, todas somos imprescindibles para poder construír esta ferramenta. Durante as campañas do 2015 e 2016 repetimos unha e millar de veces que “a suma multiplica”, esa heteroxeneidade que foi a nosa maior forza non pode converterse nunha debilidade, por causa de non ser capaces de saber xestionar esa riqueza que supón a suma de tradicións políticas tan dispares.

Para que a ferramenta sexa valida hai que reverter a deriva destrutiva, deixar de resaltar as diferenzas e colocar o foco en todo o que nos une, en todos os proxectos comúns, en todas esas ideas de país que partillamos e que só poderán materializarse se, outra vez, somos quen de confluír, cooperar e construír dentro dun proxecto común, amplo e aberto de unidade popular.

2.2 A renovación do Consello das Mareas

Estatutariamente a renovación do Consello das Mareas tería que realizarse a finais de xaneiro do 2019, a só catro meses dunhas eleccións municipais que se mostran como claves para o futuro da unidade popular en Galicia. Esta proximidade temporal non semella o máis axeitado, visto desde a perspectiva municipal, xa que nese momento os esforzos terán que estar centrados na construción das candidaturas e alternativas programáticas locais.

Ademais, e por todo o explicado nos puntos anteriores, podemos afirmar que o mandato do actual Consello está esgotado politicamente e que a súa renovación, canto antes, é o único camiño que nos pode achegar a un relanzamento de En Marea. Neste sentido, se finalmente o Consello das Mareas non activase a súa renovación de xeito inmediato, existirían motivos suficientes para procurar outras vías como as do revogatorio.

Sexa pola vía do adianto, sexa pola vía revogatoria, existen varias cuestións para abordar o proceso coas irrenunciables garantías democráticas:

Que a proposta de regulamento que rexa a renovación do Consello sexa clara e non dea lugar a interpretacións confusas.
Que se clarifique a validez e vixencia do actual censo de En Marea e se está adaptado á normativa vixente ou non.
Que se facilite a inscrición daquelas persoas que participan do espazo político da unidade popular galega.

Cómpre sermos totalmente esixentes en que se cumpran todas as garantías democráticas para abordar o proceso e que este se realice canto antes.

Activándose xa o proceso conseguiremos distanciar esta renovación dos procesos municipais e colocar nun segundo plano as cuestións orgánicas relacionadas con En Marea.

As organizacións participantes da Mesa da Confluencia comprométense a fomentar a participación nas eleccións para a renovación do Consello das Mareas e a esixir e, no seu caso, activar as vías para que isto suceda canto antes. Para iso presentan este documento elaborado nas sesións de traballo da Mesa para a Confluencia polas persoas delegadas, que participaron nas reunións, pertencentes ás seguintes organizacións:

Compostela Aberta
Ferrol en Común
Marea Atlántica
Anova – Irmandade Nacionalista
Esquerda Unida
Podemos – Galicia

Antón Sánchez: «República desde os concellos porque no local, na primavera municipalista, construímos desde abaixo a Unidade Popular»

Celebraremos a palestra Novo tempo para a Unidade Popular, coa membro da mesa política de EH BIldu Maria del Rio, a ex alcaldesa de Badalona Dolors Sabaté, e o noso Portavoz Nacional Antón Sánchez. Será moderada pola xornalista Eva Lema.

O propio 25 haberá un acto político que contará coas intervencións de Xosé Manuel Beiras, Antón Sánchez, Oriana Méndez, Branca Novoneyra e Iván Rodríguez.

Santiago de Compostela, 20 de xullo de 2018.- Hoxe pola mañá tivo lugar en Santiago de Compostela a rolda para presentar República desde os concellos, o lema elixido este ano para enmarcar os actos de Anova Irmandade Nacionalista este 24 e 25 de xullo.

A nosa responsable de institucional Lara Rodríguez foi a encargada de presentar a programación deste día. Na súa intervención lembrou que «a coalición do 155» foi quen rematou co mandato de Dolors Sabaté en Badalona, nunha moción de censura presentada polo PSC e apoiada polo PP de Garcia Albiol e Ciudadanos.

Tamén informou da xornada do 25 que comezará a partir das 13.00 horas no parque de Galeras. Aparte do acto político unha romaría con xantar popular e un concerto do Leo a partir das 16.30 horas.

Antón Sánchez lembrou que nesta xornada «Anova reivindica a condición de Galiza como nación e o seu dereito a exercer a plena soberanía para mellorar a vida das persoas» dentro dunha dinámica na que «Galiza está a perder peso económico e político por unha situación de subordinación fronte a outras estruturas políticas e por contar cun goberno actual do señor Feijóo que despreza a pelexa por conseguir a soberanía e os avances no autogoberno». Por iso «reivindicamos Galiza como nación, reivindicamos o exercicio de soberanía e tamén a República».

Antón Sánchez defendeu o proceso de consolidación da Unidade Popular e en concreto os procesos municipalistas que están en marcha: «Os concellos son o talón de Aquiles do Partido Popular. Son a súa fronte política máis vulnerable e desde os concellos hai que construír unha alternativa de unidade popular asegurar unha nova derrota do Partido Popular en 2019 que permita rematar coa súa hexemonía institucional nas eleccións galegas de 2020». Non hai só que apoiar a gobernos de cidades como Coruña, Ferrol e Santiago ou vilas como Teo ou Val do Dubra, «hai que inzar Galicia de candidaturas municipais de Unidade Popular para garantir a derrota do Partido Popular».

Antón Sánchez mostrouse favorable da proposta de Compostela Aberta xa que dende Anova «apoiamos a apertura do diálogo e de procurar acordos e consensos para dar un renovado impulso á Unidade Popular» e para iso faise necesario “practicar a xenerosidade» e evitar «enrocarse en posicións de parte que non conducen a ningures. Iso é o que agarda a cidadanía que nos apoiou».

En relación aos debates que se están a dar sobre o futuro En Marea, Antón Sánchez sinalou que «nos acordos constituíntes de En Marea e no programa electoral sempre estivo o dereito de autodeterminación. Sempre foi un dos piares da Unidade Popular neste país. Para nós é unha cuestión fundamental, e é compatible coa aposta da esquerda federal e o recoñecemento da plurinacionalidade do Estado español. Este non é o problema que temos hoxe no espazo. Estivo recollido no Acordo de Mazarelos e antes en AGE».

Actos do 24 e 25 de xullo – República dende os Concellos

24 e 25 de xullo
República desde os concellos

Martes 24 de xullo, na Facultade de Filosofía da USC (Praza de Mazarelos) ás 19:30 horas:

“Novo tempo para a Unidade Popular”

-Antón Sánchez-Portavoz Nacional de Anova
-Dolors Sabater-Ex alcaldesa de Badalona
-María del Río-EH Bildu
-Modera: Eva Lema-Xornalista

No martes 25 de xullo terá lugar o acto político – que contará cunha intervención do noso Portavoz Nacional Antón Sánchez – e unha romaría e xantar popular no Parque de Galeras (Compostela), a partir das 13:00 horas. A partir das 17.00 horas contaremos coa actuación musical do Leo.

Antón Sánchez: «Anova valora positivamente a proposta lanzada por Compostela Aberta para resolver os problemas dentro de En Marea»

Xosé Manuel Beiras: «É fundamental que a vangarda das mareas se reduplique, e non pode ser obxecto de interferencias por parte de En Marea»

Teo, 14 de xullo de 2017.- Hoxe tivo lugar unha xuntanza ordinaria da Coordinadora Nacional de Anova Irmandade Nacionalista. Data que coincide co sexto aniversario da nosa Asemblea Nacional Constituínte. Así o noso Portavoz Nacional falou deste tempo como «seis anos moi intensos de aposta pola ruptura con este Réxime a través da ferramenta da unidade popular, de maneira xenerosa».

Antón Sánchez informou da valoración positiva da proposta lanzada pola coordinadora de Compostela Aberta. Unha proposta «construtiva de diálogo» na que se debe avanzar porque «o inmobilismo só serve para que apodrezan as cousas. A xente da rúa segue dicíndonos que nos poñamos de acordo entre diferentes para ser alternativa política neste país».

Pola súa banda, o noso compañeiro Xosé Manuel Beiras lembrou que «o proceso dunha estratexia pola unidade popular non comezou coa creación dun partido, se non que comeza co xurdimento das alternativas e proxectos a nivel local e comarcal antes das municipais de 2015». As mareas municipalistas gañaron «nos feudos do poder do Partido Popular» nos que «a cidadanía do común foi protagonista».

Xosé Manuel Beiras manifestou que para a continuidade do proceso é fundamental «redobrar esforzos» na consolidación das mareas municipalistas. Nese sentido existen elementos que evidencian que «En Marea non ten claro isto da autonomía municipal» con «interferencias moi graves, coma en Ferrol» En relación á proposta de Compostela Aberta, afirmou que «a interlocución non vai contra ninguén. Se hai un problema non pode negarse».