Beiras

Xosé Manuel Beiras apoia a candidatura de Narón por Diante

A candidatura está encabezada por André Abelendo, e pretende abrir as portas do Concello para poñer a institución ao servizo das maiorías sociais agredidas.

Neste video o noso compañeiro Xosé Manuel Beiras expón os motivos que fan que apoie a candidatura de Narón por Diante.

Narón, 21 de maio de 2019.- Xosé Manuel Beiras destacou o feito de que a candidatura de Narón por Diante sexa “encabezada por un loitador sindicalista”, en referencia a André Abelendo. Nese sentido defendeu que “é unha candidatura que loita polos valores fundamentais para unha democracia e para os cidadáns”, facendo referencia á “liberdade, fraternidade e benestar da xente do común, da xente de abaixo”.

Resaltou que Narón por Diante “non son políticos profesionais”, se non cidadáns activos que “pretenden defender aos que nunca son defendidos, que son sistematicamente enganados por aquelas candidaturas que prometen cousas e que cando chegan ao poder fan todo o contrario. Esta é a enorme diferencia entre Narón por Diante e calquera das demais”.

“Polo tanto pido o voto para Narón por Diante, para André Abelendo e ás compañeiras e compañeiros da candidatura”, rematou afirmando Xosé Manuel Beiras.

 

Xosé Manuel Beiras asistirá ao funeral de Xabier Arzalluz

O noso compañeiro Xosé Manuel Beiras asistirá aos actos de despedida de Xabier Arzalluz, loitador antifranquista e dirixente do PNV, organización que presidiu entre os anos 1980 e 2004, con quen participou fraternalmente no relanzamento do proxecto de Galeusca no ano 1998. O enterro terá lugar o vindeiro sábado 2 de marzo en Bilbao.

Queremos destacar o traballo realizado por Xabier Arzalluz na defensa do dereito a decidir dos pobos e na defensa da liberdade das nacións sen Estado.

Anova traslada a súas condolencias aos familiares e amigos de Xabier Arzalluz, así como ás mulleres e homes do PNV.

Fotografía de Lalo R. Villar | Xornal El Pais.

Xosé Manuel Beiras participa na palestra «A transición nas nacionalidades» en Iruña

A finais de febreiro tivo lugar, en Iruña, unhas xornadas ao redor da Transición. Xosé Manuel Beiras participou xunto con Sánchez Gordillo e Alfredo Bienzobas nunha palestra cuxo título foi «A transición nas nacionalidades». As xornadas estiveron promovidas polo colectivo “Sanfermines 1978: Gogoan!”, do que forma parte o noso amigo Sabino Cuadra. Agora difundimos o vídeo completo deste acto.