Antón Sánchez e Martiño Noriega participarán na manifestación contra a sentenza política do Tribunal Supremo

Antón Sánchez e Martiño Noriega participarán este sábado 26 de outubro en Barcelona na manifestación que a ANC e Omnium Cultural convocan en resposta á sentenza política do Tribunal Supremo, contra a represión e a prol dos dereitos políticos e as liberdades civís.

Aproveitarán a súa estancia para manter reunións políticas cos diferentes sectores da esquerda e do republicanismo e independentismo catalán.

Santiago de Compostela, 24 de outubro de 2019.- O vindeiro sábado 26 de outubro os diferentes axentes do republicanismo e independentismo catalán organizan unha grande manifestación en Barcelona para denunciar a sentenza política do Tribunal Supremo. Estamos diante dun episodio máis da represión que se vive nestes momentos en Cataluña, onde usan a coartada dun problema de orde pública para ocultar o conflito político, que só se poderá solucionar dende o diálogo democrático e o respecto da vontade do pobo catalán.

Antón Sánchez e Martiño Noriega aproveitarán a súa estancia en Barcelona para compartir análises e valoracións políticas con outras entidades da esquerda e do republicanismo e independentismo catalán. Trátase establecer unha diagnose da situación e ver en que medida se pode reverter este ataque constante aos dereitos políticos e ás liberdades civís no conxunto do Estado español.

A cooperación das diferentes esquerdas tanto federais como soberanistas é un obxectivo a acadar neste momento no que se endurece e se practica unha saída autoritaria á crise do Réxime do 78. Esa colaboración ten que atravesar as dinámicas de mobilización e de empoderamento popular, para facer fronte ao auxe do autoritarismo e ao rearme da ultradereita.

Coa nosa presenza en Barcelona queremos reafirmar o noso compromiso coa Cataluña republicana, co necesario diálogo democrático para a resolución deste conflito e coa defensa do dereito de autodeterminación. Mantemos de forma firme a nosa posición a prol da liberdade dos presos e presas políticas e a volta a casa daqueles dirixentes que tiveron que exiliarse por esta causa.

 

Anova denuncia a sentenza política do Tribunal Supremo contra os dirixentes independentistas cataláns

Esta sentenza do Tribunal Supremo mostra unha vez máis o intento de pechar de forma autoritaria a crise do Réxime do 78, intensificando a represión contra os movementos que defenden o dereito a decidir e contra a xente do común que denuncia as políticas neoliberais.

Santiago de Compostela, 14 de outubro de 2019.- Finalmente cumpriuse á perfección o guión que nestes últimos tempos anunciaban os principais voceiros do status quo: diante do desafío democrático que supuxo a posta en marcha do referendo do 1 de outubro de 2017, era preciso impoñer para o Estado español unha sentenza exemplar.

Ese foi o contido da mensaxe do monarca Felipe VI poucos días despois daquela xornada de dignidade colectiva, na que a cidadanía do común desafiou a violencia dunhas cargas policiais que abriron os telexornais de medio mundo. A continuación veu a aplicación do 155 por parte do executivo de Mariano Rajoy, facendo uso o Estado español dunha ferramenta de excepción para suprimir unha xa de por si precaria autonomía a golpe de Senado. E agora este xiro autoritario xa ten unha coartada xurídica dada polo Tribunal Supremo para lexitimar unha posición política: a de que a democracia ten límites no momento no que se desafían os intereses das elites centralistas e no que se pretenden abrir horizontes constituíntes.

Estamos diante dunha sentenza agardada, que demostra a incapacidade por parte do status quo do Estado español de abrir as portas ao diálogo. Un diálogo que para ser efectivo debe ir alén das palabras, permitindo a posta en marcha de calquera proxecto político, materializable sempre e cando dispoña de apoio cidadá. Algo tan simple como iso queda en evidencia hoxe, no século XXI, no Estado español.

Cataluña chega a esta situación despois da promesa incumprida por José Luís Rodríguez Zapatero de respectar na súa integridade o Estatut que saíu do Parlamento de Cataluña. Incumpriuse primeiro no seu paso polo Congreso, posteriormente cepillado polo Tribunal Constitucional despois dunha denuncia posta a instancia do Partido Popular. A cerrazón do PP e do PSOE á hora de aceptar a existencia de diferentes nacións no Estado contribuíu a que non se abrisen as opcións ao diálogo político e á resolución democrática. Queda constatado que no actual marco xurídico-político do Estado español non se poden materializar todos os proxectos políticos, aínda que sumen maiorías sociais e electorais.

Precisamos sumar vontades, no inmediato, para blindar dereitos sociais e civís recollidos mesmo no actual marco xurídico-político. A sentenza entra dentro dunha estratexia para establecer un marco de excepcionalidade xurídica que neste caso atravesa ao independentismo catalá, pero que mañá se podería estender a outros movementos. De feito xa o fai no momento no que existen mordazas lexislativas en contra da liberdade de expresión, cando se criminalizan protestas en defensa dos dereitos sociais por parte das e dos que padecemos as consecuencias da crise.

É importante entender e explicar que os dereitos e liberdades que hoxe se violentan en Cataluña mañá poden estar en risco en Galicia ou en calquera parte do Estado. Trátase de criminalizar a protesta para procurar ter unha sociedade mansa. A Galicia que se move en plataformas e loitas cívicas contra as políticas neoliberais da Xunta de Galicia ben sabe do que estamos a falar.

Anova non concorrerá no 10-N por non ser posible unha Fronte Ampla que dea continuidade ao proceso de acumulación de forzas iniciado en 2012

Verificamos que os intereses dos partidos estiveron por riba dos intereses da xente do común.

Anova non contribuirá nas eleccións estatais ao proceso de atomización da esquerda, xa que non foi posible garantir unha única papeleta do espazo de ruptura en Galicia.

Santiago de Compostela, 30 de setembro de 2019.- O pasado sábado 28 de setembro a militancia de Anova que participou na nosa Conferencia Política reafirmou o compromiso da organización a prol dunha “proposta unitaria de Ruptura co Réxime que sexa capaz de recoller todo o potencial transformador, unha aposta que sexa reflexo dun suxeito político galego como espazo de toma de decisións”.

Tratábase, por tanto, de sumar partidos políticos, mareas municipalistas e axentes sociais nun actor posto a disposición do cambio político que conformase un suxeito político propio nas Cortes do Estado, cun programa social avanzado na defensa das maiorías sociais agredidas que respectase o dereito de autodeterminación. Apostabamos por dar continuidade ao espazo que abrimos en Galicia coa emerxencia de AGE, coa participación dos continxentes cidadáns organizados nas mareas municipalistas, co Pacto de Mazarelos e coa Asemblea de Vigo na que nacería a primeira En Marea.

Fixemos chegar esta proposta aos diferentes axentes interpelados e infelizmente verificamos que non houbo resposta positiva para armar unha nova Fronte Ampla. Entendemos que a competición entre diferentes opcións do espazo de ruptura divide a necesaria unidade e non se corresponde coa nosa aposta pola acumulación de forzas, motivo polo que decidimos non concorrer ás vindeiras eleccións xerais.

Seguiremos a traballar dende a cooperación nos espazos políticos e institucionais compartidos, coidando dende alí o funcionamento do proxecto común. No inmediato, traballaremos xa para conseguir que nas vindeiras eleccións autonómicas poidamos conseguir esa unidade de acción que impida revalidar ao PP o goberno do País. A situación de emerxencia social que viven as nosas clases populares merecen recuperar verdadeiras fórmulas comúns que poidan disputar todas as hexemonías.

Anova propón unha nova Fronte Ampla para as vindeiras eleccións xerais

Na Conferencia Política preasemblearia que tivo lugar hoxe en Santiago de Compostela,
Anova reafirma o seu compromiso cunha aposta unitaria de ruptura co Réxime que sexa capaz de recoller todo o potencial transformador, unha aposta que sexa reflexo dun suxeito político galego como espazo de toma de decisións.

Este espazo debe de contar con todos os actores políticos posibles como as mareas municipais e cidadanía auto-organizada, que xunto ás organizacións políticas de esquerda deben ser participes e protagonistas dun suxeito que sexa quen de estar en disposición de frear ao bloque reaccionario da dereita, ser quen de ilusionar á maioría da sociedade fronte á estratexia do Réxime bipartidista de fortalecerse nas vindeiras eleccións.

A Fronte Ampla debe concretar unha mesa de coordinación política na que deben estar representados todos os axentes do espazo de ruptura, sen exclusións, partidos políticos e mareas municipalistas na fórmula que se concrete. Esa mesa de coordinación política debe dirixir a actividade do espazo e crear mecanismos de dación de contas coa cidadanía das deputadas e deputados electos, así como a interlocución continua con outros espazos institucionais como poden ser o Parlamento Galego e os diferentes concellos do país.

Espazo que debe de estar baseado nun programa común con orientación constituínte, que defenda o dereito a decidir e a democratización do sistema económico.

Nese sentido, Anova entende que dentro dese acordo programático debemos situar:
1 | A defensa da soberanía popular da nación galega como suxeito político con dereito a decidilo todo.
2 | Compromiso activo na loita contra o cambio climático. Superación dun sistema que esgota os nosos recursos naturais e beneficio das grandes multinacionais que se enriquecen coa depredación do noso territorio.
3 | Derrogación das Reformas Laborais de PP e PSOE. Impulso dun Marco Galego de Relacións Laborais. Plan de retorno para a mocidade que tivo que emigrar como consecuencia das políticas neoliberais.
4 | Posta en marcha de políticas públicas que impidan a desindustrialización e a deslocalización de empresas en Galiza.
5 | Derrogación da reforma do artigo 135 da Constitución do 78 e recuperación da soberanía financeira da administración local.
6 | Reafirmar o noso compromiso co feminismo e a igualdade, con políticas debidamente orzamentadas.

Liñas radicais que sexan compatibles con acadar maiorías sociais suficientes para disputar a hexemonía ao bipartidismo.

É necesario recuperar os valores que levaron en Galiza ao proceso de acumulación de forzas dende 2012, e para elo é preciso a xenerosidade para incluír no proceso a toda a diversidade dun espazo onde se acorde entre iguais.

Por todo isto, ANOVA fai un chamamento a toda a esquerda política e social galega para buscar e conseguir facer unha candidatura alternativa real e unitaria. Unha Candidatura que sexa quen de gañarlle á frustración e á desmobilización.

Anova trasladará estas propostas aos diferentes axentes do espazo de ruptura en Galicia para deixar abertas as portas do acordo até o último minuto. Por nós non vai quedar que haxa unha única papeleta do espazo o vindeiro 10-N.

Anova lamenta o incumprimento da vontade popular que leva á repetición electoral e agasalla unha nova oportunidade ao bloque de Colón

De nada servirán propostas de solución partidarias se non hai altura política para xerar unha verdadeira alternativa unitaria na esquerda, que garanta un goberno de progreso.

A decepción na cidadanía é enorme, a decisión do PSOE deixa unha situación política perigosa na que o cansanzo e fastío cidadán pode orixinar un escenario que potencialmente pode darlle unha nova oportunidade ás dereitas derrotadas en abril.

Anova cre que debe existir no contexto do Estado un diálogo político de toda a esquerda, xunto con axentes cidadáns e sociais, para buscar unha alternativa real, unitaria e sen exclusións que supere os límites partidarios para conseguir un goberno progresista.

 

Santiago de Compostela, 18 de setembro de 2019.- A convocatoria de eleccións xerais o vindeiro 10 de novembro evidencia que o PSOE bloqueou un acordo de esquerdas, buscando o respaldo de Ciudadanos e mesmo do PP antes de aceptar un acordo de goberno con todas as forzas políticas que permitiron a moción de censura pola que Pedro Sánchez chegou a Moncloa.

Unha parte grande da cidadanía galega valora con preocupación a situación e rexeita todo o proceso que se deu desde as eleccións do 28A, quedou patente como o PSOE impediu a conformación dun goberno progresista que parase o avance do trifachito. A intención semella clara, recompoñer o réxime do 78 e o bipartidismo que o sustentou.

Moitos sectores políticos puidemos ter erros pero afirmamos que segue sendo necesaria unha alternativa de esquerda, unitaria, ampla e xenerosa para xerar a frear o desencanto cidadá.

Unha alternativa que sobarde as estruturas partidarias e que vaia máis alá de siglas. A esquerda real debe ser quen de ofrecer unha alternativa real á cidadanía desencantada coa operación do PSOE de refundar o réxime do 78 para que nada cambie.

Hoxe máis ca nunca urxe a necesidade de cambio na estrutura dun Estado que pretende unha nova volta de torca contra as clases traballadoras de todo o territorio estatal, das nacións e pobos do Estado. O 135 e o 155 volven ser unha ameaza da man do PSOE, PP e extrema dereita contra toda a cidadanía e os seus dereitos.

De nada servirán propostas de solución partidarias se non hai altura política para xerar unha verdadeira alternativa unitaria na esquerda.

Anova cre que debe existir no contexto do Estado un diálogo político de toda a esquerda, xunto con axentes cidadáns e sociais, para buscar unha alternativa real, unitaria e sen exclusións que supere os límites partidarios.

Nun momento de reforzamento da dereita coa ultradereita, na que estudan formular candidaturas unitarias do bloque de Colón baixo a marca de “España Suma”, a posición do PSOE evidencia a súa conexión cos poderes económicos e o cero interese en artellar unha maioría parlamentaria coas forzas que permitiron a súa entrada despois da moción de censura contra Mariano Rajoy.

O PSOE incumpriu o mandato electoral do 28-A e leva a cabo unha política de terra queimada contra todas as forzas políticas que están á súa esquerda, evidenciando non só unha política dereitista no que ten que ver coas políticas económicas e sociais, senón que tamén se pon enriba da mesa unha posición centralista homoxeneizadora que se nega a aceptar a existencia de diferentes nacións no Estado español.

Diante deste horizonte, pensamos que as forzas de esquerda de todo o Estado deberan intentar unha fronte común que pare esta estratexia de reforzar o réxime con recortes democráticos e posicións que camiñan cara o totalitarismo.

Non é hora de priorizar intereses partidarios senón de xenerosidade, é hora de Frente Popular.

En Galicia sabémolo ben, a nosa historia ensinounos que a esquerda soberanista, o independentismo e o galeguismo estivo coa Frente Popular cando máis necesario era.

Desde o ano 2012 temos demostrado tamén que fomos pioneiros en construír alternativas reais desde a esquerda, unha Fronte Ampla que xerou unha alternativa real nas esquerdas, proxectos de Unidade Popular que desde o respecto plasmouse en cotas altas de respaldo cidadá sendo quen de sermos alternativa real de poder popular.

Debemos dar continuidade aos camiños diversos e plurais da Unidade Popular e volver á aposta pola ruptura democrática, a defensa dos dereitos sociais e das liberdades cidadás e nacionais de Galicia.

As clases traballadoras e a cidadanía xóganse moito, desexamos e agardamos que nesta ocasión non se desperdicie unha nova oportunidade de frear este novo embate autoritario do réxime.

Anova asistirá á celebración da Diada

A delegación de Anova ten previsto manter conversas con organizacións do espectro do republicanismo e do independentismo catalán de esquerdas, de cara a facer unha diagnose do momento político nas nosas respectivas nacións e analizar o momento que vive o Estado español.

Santiago de Compostela, 10 de setembro de 2019.- Nun ano marcado pola inminencia da sentenza contra referentes sociais e dirixentes políticos acusados de organizar o referendo do 1-O, unha delegación de Anova asistirá un ano máis á celebración da Diada de Cataluña.

Con esta presenza queremos facer pública a nosa solidariedade cos presos e presas políticas e exiliados e exiliadas, así como con toda a cidadanía que sofreu as cargas policiais e a e represión para garantir a celebración do referendo do 1-O.

Dende a aplicación do 155 asistimos a un proceso de radicalización das posicións unionistas e do auxe da ultradereita, socia de goberno do Partido Popular en gobernos autonómicos e municipais. Semella que a súa axenda pasa por reforzar as posicións centralistas, reducir unha autonomía xa de por si limitada e aplicar mordazas e represión a todos os movementos socio-políticos que se enfrontan a esa ameaza.

Nese sentido en Cataluña non só se evidenciou a carencia de democracia á hora de aplicar o dereito de autodeterminación, se non que se fixo evidente que diante dunha aposta destituínte e democrática o Réxime do 78 non dubida en reforzar a súa faciana represiva para frear o empoderamento popular.

As consecuencias desa cerrazón e a aplicación deses dispositivos, que van dende o 155 a limitar dereitos e liberdades recollidas mesmo na propia Constitución, terán efectos tamén en Galicia á hora de frear as iniciativas populares que enfronten as consecuencias do neoliberalismo.

Presentamos alegacións ao Plan Especial “Senda Fluvial Río Maior” do Concello de Bergondo e denunciamos a deficiente planificación e xestión do saneamento do bipartito

Anova Bergondo entende que o cauce do Río Maior é un espazo de alto valor medio ambiental e que o plan especial pode supoñer un perigo de contaminación por vertidos ao río.

Bergondo, 4 de setembro de 2019.- Anova Bergondo presentou alegacións ao Plan Especial senda fluvial do Río Maior.Dende Anova entendemos que hai tres aspectos que son especialmente preocupantes e deben terse en conta antes de executar o proxecto.

O primeiro é a denominación do propio proxecto,a senda fluvial non é máis que un pretexto para colocar os tubos e colectores,un xeito de tapar a obra cun camiño,feito claramente demostrable tendo en conta que a senda remata no límite co Concello de Sada,cando o máis acaido tería sido unha actuación conxunta que levase a senda ate o centro urbano do Concello veciño.O proxecto fala da colocación de tres colectores principais e sete xa existentes,as augas residuais irían a dar a unha estación de bombeo que terá que impulsar as augas sucias de máis de trescentas vivendas,non parece que esta estación teña capacidade para iso co risco de verquidos que iso supón.O proxecto tampouco especifica ate que punto a EDAR de Gandarío podería asimilar as augas residuais bombeadas dende esta zona.

Unha estación de bombeo para as augas fecais máis de 350 vivendas ao carón do Río Maior significa un risco elevado de contaminación por desbordamentos en determinados momentos, e todo elo é consecuencia dun deseño municipal do saneamento irracional e insostible como xa temos denunciado anos atrás ante a construción da EDAR de Gandarío.

O segundo aspecto, polo tanto, é a contaminación do Río Maior,un feito denunciado polos veciños de Lubre durante anos e que é debido principalmente aos verquidos da depuradora do Polígono de Bergondo.Colocar agora tres colectores principais a carón do cauce nos parece un risco moi serio,é por iso que solicitamos un estudo do estado do río e que se busque un trazado alternativo para unha obra moi necesaria para os veciños.

Finalmente queremos destacar que a memoria do proxecto recolle que hai dezaseis elementos de interese cultural no recorrido da senda que se atopan en un pésimo estado de conservación.Non está previsto investimento de ningún tipo nestes elementos (muíños de auga, lavadoiros…) pero pola contra hai unha partida de 80.387,60 euros para mobiliario urbano e arbolado.Entendemos que esta actuación require de especial coidado e de ser respectuosa co medio,por iso solicitamos se teña en conta a recuperación dos elementos de interese cultural e se minimice o uso de papeleiras e elementos que están fóra de lugar a carón dun río.

Antón Sánchez: “Hoxe hai 10.000 galegos e galegas demandantes de vivenda de alugueiro social aos que non se lles da ningunha solución”

No ano 2018 só se concederon dúas axudas dende o Programa de Vivendas Baleiras, por un montante de 6986 euros, un 5,37% do orzamentado. Antón Sánchez denunciou o “fracaso absoluto” das políticas de vivenda da Xunta de Galicia, xa que fortalecen aos especuladores e desprotexen á cidadanía.

A nosa alternativa sería “apostar por un parque público de vivendas de alugueiro social para darlle solucións as persoas e como mecanismo regulador dos prezos de mercado”.

Santiago de Compostela, 26 de agosto de 2019.- Hoxe Antón Sánchez compareceu diante dos medios no Concello de Cambre, diante do edificio A Patiña, “onde antes había xente que vivía cuns prezos de alugueiro social, con límites a eses prezos de alugueiro, construídas e subvencionadas en parte con diñeiro público, mentres que agora permítese que os fondos voitre compren estas vivendas que foron feitas con diñeiro público para facer negocio”, afirmou.

Os datos publicados recentemente polo IGVS das axudas concedidas durante o ano 2018 son demoledores para o que o PP vendeu como programa estrela para a mobilización de vivenda baleira.

O Programa de Vivendas Baleiras o ano pasado só se concedeu dúas axudas por un montante ridículo de 6986 euros, o que significa un 5,37% do orzamentado, dunha partida que xa se reducira á metade con respecto ao ano 2017. Nese 2017 concedéranse 4 axudas soamente, cunha porcentaxe de execución dun 3,32%.

En resumo, despois de 3 anos dende a creación do Programa de Vivendas Baleiras téñense incorporado ao redor de 20 inmobles e non se adxudicaron nin a metade, e iso cando existe un rexistro de case 10.000 persoas en Galiza de vivenda de alugueiro social.

Un “fracaso absoluto” tan grande esixe a asunción de responsabilidades políticas e un xiro total nas políticas de vivenda en Galiza, para frear a auténtica sangría que se está a producir e que pode agravarse.

“Estase a dar unha suba espectacular do prezo do aluguer en Galicia, especialmente nas zonas urbanas”, cando non acontece o mesmo cos ingresos ou a estabilidade laboral da xente, o que se traduce en novos desafiuzamentos ou na imposibilidade estrutural de emancipación da nosa mocidade.

Reclamamos que inmediatamente se aprobe un plan eficaz para a creación dun “parque público de vivenda de alugueiro social” que de resposta aos problemas graves que sufrimos como sociedade, coa incorporación de vivenda baleira, nun país con 300.000 vivendas nese estado, ou coa construción de novas vivendas cando sexa necesario.

Débense de tomar medidas efectivas para a que as vivendas en mans dos grandes especuladores non fiquen baleiras e cumpran coa súa función social, poñéndose a disposición de quen máis as precisa.

Denunciamos de novo unha operación de propaganda da Xunta de Galicia que tan só busca encher titulares ao tempo que non soluciona este problema. Seguiremos a propoñer medidas alternativas no Parlamento Galego e acompañar á sociedade que denuncia esta situación para buscar solucións que beneficien á maioría social.

Antón Sánchez pide ao Defensor do Pobo que requira información á Xunta sobre a reapertura da mina de Touro e critica a obstaculización do goberno galego

O deputado no Parlamento galego realizou unha avaliación positiva da xunta con esta institución pola “receptividade e a vontade a cooperar para que o Goberno galego informe sobre a situación do expediente administrativo do proxecto

Madrid, 24 de xuño de 2019. O deputado no Parlamento galego e portavoz nacional de Anova IN mantuvo este mediodía unha xunta na sede do Defensor do Pobo en Madrid co Director do Gabinete desta institución, Francisco Virseda, e o Responsábel de Medio Ambiente, Pedro Maura, para abordar o estado do proxecto de reapertura da mina de Touro. Á xunta escusouse Francisco Fernández Marugán por se atopar nun acto co xefe de estado.

Á saída da reunión, Antón Sánchez resaltou a receptividade, “a sintonía e o grao de coñecemento que o gabinete do Defensor do Pobo posúe do tema da mina de Touro en particular, pero da política en materia de extracción mineira en Galiza en xeral”. Trasladoulles “o bloqueo constante da Xunta no acceso á información sobre o expediente da mina de Touro así como noutros proxectos”, pedíndolle a intermediación para que esta institución se dirixa ao Goberno galego e aporte a información que se lle solicita sobre a reapertura da mina de Touro.

Iniciar o proceso para decretar a caducidade do expediente

Ademáis, Sánchez explicoulles que o 17 de outubro de 2018, iniciouse o proceso de declaración de impacto ambiental que segundo a lei vixente ten un prazo estabelecido de 4 meses, e dous de prórroga xustificada. Neste sentido, recalcou que “desde o noso punto de vista debería iniciarse o proceso de caducidade do procedemento por ter superado o prazo”. Criticou a “opacidade e o oscurantismo co que se está a levar este procedemento do que a Xunta non nos aporta información”.

O Director do Gabinete do Defensor do Pobo recibiu positivamente a petición do deputado no Parlamento galego de que se requira información á Xunta e se poida abordar a cuestión da caducidade, facéndoo de xeito oficial (por escrito) ao Defensor do Pobo. Así, Antón Sánchez anunciou após o encontro que “abriremos esa vía para que dende o Defensor do Pobo se requira toda a documentación á Xunta”.

Descontrol da Xunta

Na xunta, o tamén portavoz nacional de Anova, realizou unha avaliación moi positiva do Informe do Defensor do Pobo sobre a mina de Touro no que salienta diversas deficiencias da Xunta no proceso como é o que atinxe ao Plan de restauración, á afectación aos recursos hídricos e a tramitación. Sánchez puxo de manifestó o “fío conductor que se produce na maneira de actuar da Xunta en todos os casos de proxectos de reapertura de explotación mineira en Galiza: descontrol, pasividade e deixación. Deixa facer ás empresas por riba do cumprimento dos procedementos estipulados por lei”.

Engadiu na súa interlocución que “fixemos moitas iniciativas no parlamento galego pero non nos aportan a información solicitada. Hai opacidade e obstaculización”, queixouse diante do gabinete do Defensor do Pobo. Precisamente, é neste punto no que demandou a colaboración desta institución. Ademáis do que atinxe ao que “consideramos un procedemento caducado. Debería decretarse a súa caducidade”.

Antón Sánchez asegurou que estas “serán as vías de traballo”.

Antón Sánchez afirma que “Ence é un exemplo claro das políticas corruptas do PP”

O portavoz nacional de Anova participou este mediodía na marcha en Pontevedra por unha ría libre da contaminación de Ence e cuxa permanencia é produto “dos entramados corruptos do PP”

Pontevedra, 16 de xuño de 2019. O portavoz nacional de Anova-IN, Antón Sánchez, participou este mediodía en Pontevedra na marcha cidadá para reivindicar unha Ría de Pontevedra libre da toxicidade de Ence e en pro de poder construir un futuro sostíbel e medioambientalmente sano, ademáis de traballar por outro modelo forestal e económico que non estea ao servizo dos intereses comerciais dunha empresa en particular. Un modelo que respecte o noso medio ambiente, a riqueza produtiva e o ecosistema das nosas rías, os nosos montes e propio de Galiza.

“O PP ao servizo das prioridades de Ence”

Nas súas declaracións, Antón Sánchez sinalou que “estamos aquí para apoiar a marcha para que Ence saia da Ría. Ence é un exemplo claro das políticas corruptas do PP, que non dúbida en utilizar as institucións para favorecer intereses privados da empresa onde funcionan as portas xiratorias e onde destacados dirixentes do PP ocupan postos no seu Consello de Administración”.

O portavoz nacional de Anova manifestou asemade que “estamos ante un exemplo de desenvolvemento colonial en Galiza, onde se crea pouco emprego de valor e en cambio provoca un enorme impacto ambiental, que non só condiciona a vida da ría senón tamén a política forestal do país. Hai que sacar a Ence da ría para poder ter outro futuro”. Criticou a “actuación fraudulenta do PP e de Rajoy renovando a prórroga por 70 anos” e censurou un xeito de facer política centrado nas prioridades de determinadas empresas en lugar de servir aos intereses dos galegos e das galegas.